سابقہ صدر بکائیف کے حامی پارلیمانی انتخابات کے لئے متحد

بشکیک -- انتیس جولائی کو ادینی کرغزستان کے رہنما اداخم مادو ماروف اور ال ارمانی جماعت کے قائد میراوسلیف نیازوف نے اعلان کیا کہ وہ اکتوبر کے پارلیمانی انتخابات سے قبل اپنی جماعتوں کا اتحاد کر رہے ہیں۔

انہوں نے کہا کہ اتحاد کی وجہ یہ ہے کہ دونوں جماعتوں کے پروگراموں کی ایک مشترکہ سیاسی اور سماجی اقتصادی سمت ہے۔

مادو ماروف نے کہا کہ اس اتحاد کو جغرافیائی لحاظ سے ملحوظ خاطر رکھا گیا ہے۔ ان کی ادینی کرغزستان جماعت شمالی علاقوں میں مضبوط ہے جبکہ نیازوف کی ال ارمانی کو جنوبی علاقوں میں زیادہ حمایت حاصل ہے۔

ماہر سیاسیات مارس ساریئیف نے کہا کہ دونوں جماعتوں کے اتحاد کی حقیقی وجہ ان کے سابق صدر کرمنبیک بکائیف کے حامی مشترکہ نظریات ہیں۔

انہوں نے کہا کہ دونوں جماعتوں نے اچانک اتحاد نہیں کیا۔ وہ ایک مضبوط آہنی مٹھی یا عبوری حکومت اور اس میں شامل یا نئے شامل ہونے والے سیاست دانوں کے خلاف ایک سیاسی اتحاد تشکیل دے رہے ہیں۔

مادو ماروف صدر بکائیف کے سرکاری سیکرٹری تھے جبکہ نیازوف سلامتی کونسل کے سیکرٹری رہ چکے ہیں۔ سودروزہستفو پارٹی کے ارکادی گلادیلوف نے بتایا کہ انتخابات سے قبل سیاسی جماعتوں کا اتحاد معمول کی بات ہے۔ تاہم ان مخصوص جماعتوں کے اتحاد کے پیچھے دیگر وجوہات کارفرما ہیں۔

انہوں نے کہا کہ کرغزستان کی سیاست میں سیاسی جماعتوں کا انضمام مشترکہ سیاسی نقطہ نظر کی بنیاد پر نہیں بلکہ جماعتی قائدین کی ذاتی ہمدردیوں کی بناء پر ہوتا ہے۔ ادینی کرغزستان اور ال ارمانی کا اتحاد انتخابی مہم میں حصہ لینے کے لئے وسائل کا انضمام بھی ہے۔

بشکیک میں منعقدہ ایک پریس کانفرنس میں انضمام کا اعلان کرتے ہوئے مادو ماروف اور نیازوف نے کہا کہ دیگر سیاسی جماعتیں بھی اس اتحاد میں شامل ہو سکتی ہیں۔

ماہرین سیاسیات کی ایسوسی ایشن کے سربراہ نور عمروف نے بتایا کہ یہ جماعتیں ان قائدین کی زیر قیادت ہوں گی جو صدر بکائیف سے قریب تھے۔

عمروف نے کہا کہ اگر جماعتیں اپنے مالی وسائل اور حامیوں کا انضمام کر لیتی ہیں تو وہ ایک غیر معمولی طاقت بن جائیں گی اور عبوری حکومت کے اراکین کی جماعتوں کو ان کا مقابلہ کرنے میں دشواری پیش آئے گی۔