کراچی کو اقتصادی نقصانات کا سامنا

کراچی -- کراچی میں سیاسی تشدد اور ہدف بنا کر قتل کرنے کے واقعات کی لہر نے کاروباری زندگی کو مفلوج کر کے رکھ دیا ہے اور شہر کے باسیوں کو اقتصادی مشکلات کا سامنا ہے۔

چار بچوں کے والد ارشد علی نے بتایا کہ شہر میں جاری ہنگاموں اور عوامی ٹرانسپورٹ کی عدم دستیابی کے باعث میں کام پر نہیں جا سکا۔ اب میری جیب خالی ہے اور میرے بچوں کو بھوکا سونا پڑے گا۔

دو اگست کو متحدہ قومی موومنٹ کے ایک رکن صوبائی اسمبلی رضا حیدر کے قتل کے بعد پھوٹ پڑنے والے ہنگاموں میں 100 سے زائد افراد جاں بحق ہو چکے ہیں۔ اگست کی 3 اور 4 تاریخ کو مقامی صنعتیں اور کاروباری مراکز بند رہے اور شرپسندوں نے درجنوں دکانوں، ہوٹلوں اور گاڑیوں کو نذر آتش کر دیا۔

تقریباً 1 کروڑ 80 لاکھ افراد کی آبادی پر مشتمل کراچی شہر کا سرکاری محصولات میں حصہ 70 فیصد کے قریب ہے اور پاکستان کی ایک چوتھائی مجموعی ملکی پیداوار یہاں سے حاصل ہوتی ہے۔

کراچی کے آل ٹریڈرز الائنس کے سربراہ عتیق میر نے بتایا کہ دو دن مقامی مارکیٹیں بند رہنے سے 2 ارب 50 کروڑ روپے سے زائد کا نقصان ہوا ہے۔ شہر کے خریداری مراکز اور بڑی مارکیٹیں زیادہ متاثر ہوئیں کیونکہ تاجروں نے دکانیں نہیں کھولیں۔

عتیق میر نے کہا کہ کراچی تشدد سے پاک ہو چکا تھا اور ملک کی کمزور معیشت میں اپنا بڑا حصہ ادا کر رہا تھا تاہم اب دہشت گرد شہر میں نسلی اور فرقہ وارانہ تشدد کو ہوا دے کر پاکستان کی معیشت کو مفلوج کرنا چاہتے ہیں۔

انہوں نے بتایا کہ تشدد کے واقعات کے نتیجے میں بہت سے کاروبار مستقل بند ہو گئے ہیں۔ انہوں نے بتایا کہ تقریباً 40 فیصد کاروبار تباہی کے دھانے پر کھڑے ہیں۔ عتیق میر نے حکومت سے شہر میں امن بحال کرنے کا مطالبہ کیا۔

پاکستان کے ایوان ہائے صنعت و تجارت کی فیڈریشن کے صدر سلطان چاؤلہ نے ذرائع ابلاغ کے نمائندوں کو بتایا کہ صرف 3 اگست کو پاکستان کو تقریباً 15 ارب روپے کا نقصان برداشت کرنا پڑا۔

چاؤلہ نے بتایا کہ شہر کے گڑبڑ زدہ علاقوں میں رہائش پذیر ملوں اور کارخانوں میں کام کرنے والے تقریباً 70 فی صد محنت کش کام پر نہ جا سکے۔

تاہم کراچی کی معیشت کے بارے میں طویل المیعاد خدشات بھی موجود ہیں۔

کراچی اسٹاک ایکسچینج کے عہدیدار رضوان اشرف نے بتایا کہ شہر میں تشدد کے واقعات پر حکومتی ردعمل سے پریشان اور غیر مطمئن مقامی سرمایہ کاروں کو دیکھتے ہوئے کوئی غیر ملکی سرمایہ کار پاکستان نہیں آئے گا۔ کراچی میں تشدد سے مارکیٹ رجحانات متاثر ہوتے ہیں۔

انہوں نے کہا کہ حکومت کو چاہیے کہ تشدد پر قابو پانے کے لئے سخت اقدامات اٹھائے اور تاجروں اور کاروباری مالکان کو اپنا کام کرنے دے۔

حکومت سندھ کے مشیر برائے سرمایہ کاری زبیر موتی والا نے بتایا کہ ہم غیر ملکی سرمایہ کاروں کو یہاں سرمایہ لگانے پر راغب کرنے کی سخت کوششیں کر رہے ہیں اور ان میں سے بہت سے اس پر آمادہ بھی ہو جاتے ہیں تاہم پرتشدد ہنگاموں کے باعث وہ واپس جانے پر مجبور ہو جاتے ہیں۔

ہدف بنا کر قتل کرنے کے واقعات کی تازہ لہر میں جاں بحق ہونے والوں کی اکثریت صوبہ خیبر پختونخواہ کے دیہاڑی دار مزدوروں پر مشتمل تھی۔

کراچی ٹرانسپورٹ اتحاد کے صدر ارشاد بخاری کے مطابق، 2 اگست کے بعد سے شرپسندوں نے 75 بسوں، عوامی گاڑیوں اور ٹرکوں کو نذر آتش کر دیا جس سے تقریباً 5 کروڑ روپے کا نقصان ہوا ہے۔

بخاری نے کہا کہ حکومت کی جانب سے تحفظ کی فراہمی میں ناکامی کے باعث ٹرانسپورٹروں کو اپنی زندگیاں خطرے میں نہیں ڈالنی چاہئیں۔ ان کا کہنا تھا کہ حکومت کو نذر آتش کی جانے والی گاڑیوں کا معاوضہ ادا کرنا چاہیے۔

ٹرک مالکان کی تنظیم کے رہنما مختیار محسود نے بتایا کہ تشدد کے واقعات میں ٹرانسپورٹروں کو بہت زیادہ نقصان اٹھانا پڑتا ہے کیونکہ بسوں، منی بسوں اور ٹرکوں سمیت بیشتر ٹرانسپورٹ پشتون باشندوں کی ملکیت ہے۔

علاقے کے پٹرول پمپوں کو پہنچنے والے نقصان اور ان کی بندش سے مزید نقصانات ہوئے ہیں۔

ایک پٹرول پمپ کے منیجر اصغر خان نے بتایا کہ شہر میں 400 کے قریب پٹرول پمپ ہیں اور ایک پٹرول پمپ پر اوسطاً یومیہ 10 ہزار لٹر پٹرول اور 5 ہزار لٹر ڈیزل فروخت ہوتا ہے۔ پٹرولیم کی صنعت کو اربوں روپے کا نقصان ہو رہا ہے جبکہ شہر کی آبادی کو ایندھن کی قلت کا سامنا ہے۔

سینئر کاروباری صحافی اور تجزیہ کار وکیل رحمٰن نے بتایا کہ تشدد کے باعث شہر پر پڑنے والے کل مالی اثرات کا تخمینہ لگانا دشوار ہے۔

انہوں نے بتایا کہ ہم کراچی میں دہشت گرد حملوں یا تشدد کے باعث ملک کی معیشت پر پڑنے والے حقیقی نقصان کا تخمینہ نہیں لگا سکتے کیونکہ اس میں بہت سے عوامل ہیں۔ تاہم کراچی میں ایک روز کی ہڑتال سے اربوں روپے کا نقصان ہوتا ہے۔