ازبکستان کے کالج مبینہ طور پر بدعنوانی میں ملوث ہیں

تاشقند – سولہ سالہ شخرت کائیبوف ایک نیم روشن کمرے میں بستر پر لیٹے چھت کو گھور رہے ہیں۔

ان کے میڈیکل کالج میں داخلہ لینے کے خواب چکنا چور ہو چکے ہیں۔

ایک ہفتہ قبل انہوں نے میڈیکل کالج میں داخلے کا امتحان دیا تھا۔

انہوں نے بتایا کہ میں کئی سوالات خالی چھوڑ آیا۔

ازبکستان میں ماضی کی نسبت آج کل داخلہ امتحانات کو کافی اہمیت دی جاتی ہے۔ بعض ماہرین تعلیم کے نزدیک اس نظام سے بدعنوانی کا خاتمہ ہوتا ہے تاہم طلباء اور والدین کا کہنا ہے کہ اس نظام سے رشوت کے دروازے کھلے رہتے ہیں۔ کرغزستان کے تعلیمی نظام کو بھی اسی طرح کے الزامات کا سامنا ہے۔

شخرت نے داخلہ امتحان میں اپنی کارکردگی کے بارے میں پوچھے گئے بیشتر سوالات کا جواب دینے سے گریز کیا اور اس کی بجائے وہ اپنی بستر کی چادر کے کنارے کو موڑنے اور اپنا ہونٹ چبانے میں مصروف رہے۔

ان کی حیاتیات کی درسی کتاب سے ان کی سابق ہم جماعت زلیخا کی تصویر جھانک رہی تھی۔

امتحان کے چند روز بعد شخرت نے خودکشی کی کوشش کی۔ ان کی والدہ نے انہیں نہانے کے ٹب میں پایا جہاں وہ اپنی کلائی کی رگوں کو کاٹ چکے تھے۔ تاہم ڈاکٹروں نے ان کی جان بچا لی۔

شخرت کی والدہ سمیرا نے بتایا کہ شخرت اور زلیخا اکٹھے اسکول جاتے تھے۔ وہ ان کی دوست تھی۔ تاہم اب نویں جماعت کے بعد ان کے راستے جدا ہو جائیں گے۔

بعض افراد کے بقول ازبکستان میں داخلوں کے لئے رشوت درکار ہے

بہت سے طلباء اور والدین کا کہنا ہے کہ امیدوار ازبکستان کے ممتاز کالجوں میں داخلہ اپنی ذہانت اور علم کی بجائے رشوت ادا کرنے کی اہلیت کی بنیاد پر حاصل کرتے ہیں۔

نو سال اسکول میں گزارنے کے بعد نوجوان کالج یا پیشہ وارانہ اسکول میں داخلہ لیتے ہیں جہاں وہ تین سالہ تعلیم کے دوران اپنے مستقبل کے پیشے کی بنیادی باتیں سیکھتے ہیں اور باقاعدہ ہائی اسکول کے کورس مکمل کرتے ہیں۔ اس کے بعد وہ یونیورسٹی میں داخلہ لے سکتے ہیں یا پھر ملازمت کی تلاش شروع کر دیتے ہیں۔

رواں سال طلباء کی ایک ریکارڈ تعداد نے ملک کے ممتاز ترین کالجوں میں داخلے کی درخواست دی ہے۔ مثال کے طور پر کالانوف انفارمیشن ٹیکنالوجی کالج میں 450 امیدواروں میں سے 150 طلباء کو منتخب کیا جائے گا۔ مجموعی طور پر 6 لاکھ طلباء ازبکستان کے 1,500 کالجوں اور ہائی اسکولوں میں داخلے کے لئے کوشاں ہیں۔

نائب وزیر اول برائے اعلٰی و ثانوی تعلیم شوکت زہافلانوف نے بتایا کہ سب سے ممتاز درس گاہوں میں طب، قانون، اطلاعاتی ٹیکنالوجی، معاشیات، ہوٹل کا انتظام و انصرام اور موسیقی و سرکس کے فنون کے کالج شامل ہیں۔

تاشقند کے ایک کالج میں داخلہ لینے والی فریدہ کی والدہ مارگریتا زاخدوفا نے بتایا کہ کالجوں کے منتظمین یہ دعوٰی کرتے ہیں کہ وہ سب سے ذہین امیدواروں کو داخلہ دیں گے تاہم حقیقت میں آپ کو رشوت دینا پڑتی ہے۔ ہم نے داخلے کی امید لگانے کی بجائے 500 امریکی ڈالر رشوت دینے کا فیصلہ کیا۔ انہوں نے بتایا کہ گزشتہ سال ان کے بیٹے نے بھی رشوت کی بنیاد پر اسی کالج میں داخلہ لیا تھا۔

زاخدوفا نے بتایا کہ داخلہ حاصل کرنے کے لئے 300 سے 3,000 امریکی ڈالر تک رشوت دینا پڑتی ہے۔

سمیرا نے بتایا کہ شخرت اور زلیخا دونوں کا خواب ڈاکٹر بننا تھا۔ انہوں نے بتایا کہ زلیخا کے والد امیر ہیں اور وہ رشوت دے کر اسے یونیورسٹی میں داخل کرا دیں گے جبکہ میں ایسا نہیں کر سکتی کیونکہ میری تنخواہ صرف 80 امریکی ڈالر ماہانہ ہے۔ اگر شخرت اچھے نمبر حاصل کر بھی لے تو رشوت کے بغیر اسے میڈیکل کالج میں داخلہ نہیں ملے گا۔

رشوت کو زندگی کی ایک حقیقت تسلیم کرنے والوں میں صرف والدین اور طلباء ہی شامل نہیں۔

یونیورسٹی کی ایک استاد ولیدہ کافوروفا نے بتایا کہ سب سے زیادہ رشوت 3,000 امریکی ڈالر کے قریب ہے جو یونیورسٹی آف ورلڈ اکنامکس اینڈ ڈپلومیسی کے خصوصی اسکول میں داخلے کے لئے لی جاتی ہے اور مزدوروں اور کلرکوں کے بچوں کو بالکل داخلہ نہیں دیا جاتا۔

ہائی اسکول کے معدودے چند طلباء ہی اپنی تعلیمی قابلیت کی بناء پر داخلہ حاصل کرنے میں کامیاب ہوتے ہیں۔

انہوں نے بتایا کہ ہمارے پاس پہلے ہی ان طلباء کی فہرست موجود ہے جنہیں داخلہ دیا جائے گا اور بیشتر والدین پہلے ہی اپنے بچوں کے داخلے کے لئے رقم ادا کر چکے ہیں۔

صوفیہ نوسیکوفا نے اس سے اختلاف کرتے ہوئے کہا کہ یہ بات سچ نہیں ہے، ہم نے کوئی رشوت نہیں دی۔ ان کی بیٹی نے یونیورسٹی آف ورلڈ اکنامکس اینڈ ڈپلومیسی کے خصوصی اسکول میں داخلہ حاصل کیا ہے۔ تاہم، انہوں نے بتایا کہ انہوں نے اپنی بیٹی کو امتحان کی تیاری کرانے کے لئے ٹیوٹر کی خدمات حاصل کی تھیں جن کی اوسط فیس 3 سے 5 امریکی ڈالر فی گھنٹہ ہے۔

امیدوار زورینہ گدزہی مرادوفا نے چار نجی ٹیوٹر رکھ کر ایک سال تعلیم حاصل کی۔ انہوں نے بتایا کہ میں ان میں سے کسی ایک کی بجائے کسی ممتاز کالج میں داخلہ لینا چاہتی ہوں۔ آپ رشوت ادا کیے بغیر کسی اچھے کالج میں داخلہ نہیں لے سکتے۔ ٹیوشن کے باوجود، میرے والد نے کالج ریکٹر کو 1,500 ڈالر رشوت دی۔

حکومت کا کہنا ہے کہ داخلہ امتحانات سے بدعنوانی کا خاتمہ ہوتا ہے

والدین اور طلباء کی جانب سے رشوت دینے کی اطلاعات کے باوجود بعض تعلیمی ماہرین کا کہنا ہے کہ امتحان کی بنیاد پر طلباء کو داخلہ دینے سے بدعنوانی کا خاتمہ ہو گیا ہے۔

تاشقند کے اطلاعاتی ٹیکنالوجی کالج میں مثلثیات کے ایک لیکچرر قادر عوظیموف نے بتایا کہ جب داخلہ نمبروں کی بنیاد پر دیا جاتا تھا تو اسکولوں کے پرنسپل اچھے نمبروں والے ہائی اسکول ڈپلومے جاری کرنے کے لئے رشوت لیا کرتے تھے۔ آج نوجوان اپنے داخلہ امتحانات دیانت داری سے دینے آتے ہیں۔

تاشقند میں کمپیوٹر ٹیکنالوجی کالج کے ڈائریکٹر کخرامون زوپاروف نے بتایا کہ داخلہ امتحانات سے امیدواروں کی علمی استعداد کی عکاسی ہوتی ہے اور صرف لائق امیدواروں کا ہی انتخاب کیا جاتا ہے۔ ان کا یہ بھی کہنا تھا کہ بدعنوانی اب بہت کم ہو چکی ہے۔

زوپاروف نے بتایا کہ پرانے نظام کی خامیاں اس وقت عیاں ہو گئیں جب سال اول کے یونیورسٹی طلباء نے بہت سے آزمائشی امتحانات دیے۔

ہائی اسکول کی استاد منیرہ خاسانوفا نے تسلیم کرتے ہوئے کہا کہ پرانے نظام میں اساتذہ رشوت کے عوض یا پرنسپل کی سفارش پر زیادہ نمبر دیا کرتے تھے۔

تعلیمی کمیشن اس عمل کا حصہ ہیں

زہافلانوف نے کہا کہ آج کی صورت حال مختلف ہے۔ داخلہ ٹیسٹ کمیشن کا کام ہے جس میں اسکول کے ڈائریکٹر، ریاستی امتحانات مرکز، وزارت تعلیم اور حاکمیتوں (علاقائی، ضلعی یا شہری انتظامیہ) کا ایک ایک نمائندہ، اور پیشہ وارانہ اسکول و کالج کے اساتذہ شامل ہوتے ہیں۔

زہافلانوف نے کہا کہ کمیشن میں شامل ان مختلف افراد کے باعث ہائی اسکول کے فارغ التحصیل طلباء کی علمی سطح کے غیر منصفانہ یا متعصب جائزے کا امکان مسترد ہو جاتا ہے۔

وزارت برائے اعلٰی و ثانوی تعلیم کے مطابق، نیا نظام نوجوانوں کی ایسے پیشے میں رہنمائی کرتا ہے جہاں ملازمتوں کے مواقع موجود ہوتے ہیں اور وہ ان کی ذاتی دلچسپیوں سے بھی مطابقت رکھتا ہے۔

ازبکستان میں داخلہ امتحان کا نظام متعارف کرانے سے قبل نویں جماعت کے صرف 56 فی صد فارغ التحصیل طلباء خصوصی اسکولوں اور کالجوں میں داخلہ لیتے تھے۔ باقی تمام تین مزید سالوں تک ہائی اسکول میں رہتے تھے اور وزارت کے خیال میں وہ پیشہ وارانہ لحاظ سے بھٹکتے رہتے تھے۔

تاہم اس نظام کو ابھی جانچا نہیں گیا اور رشوت ادا کرنے کے امکانات کے پیش نظر کم از کم بعض واقعات میں طلباء باہر رہ جاتے ہیں۔

شخرت نے کہا کہ اس کا مطلب ہے کہ مجھے اپنے ذہن سے ڈاکٹر بننے کا تصور نکالنا ہو گا اور زلیخا کو بھی بھولنا ہوگا۔